اتجوزت كبير

الفصل الأول: العروسة اللي هربت قبل فرح أختي بيوم واحد، صحيت على صوت أمي وهي بتصرخ من أوضة العروسة: — لين هربت! انفضحنا يا أسما... الحقينا! فتحت عيني مفزوعة، ورميت الغطا من عليا وجريت ناحية صوتها وأنا حافية، حتى الطرحة ما لحقتش ألفها كويس على راسي. في الأول افتكرت أمي من الصدمة بتقول أي كلام. لين تهرب إزاي؟ وبكرة فرحها! والنهارده ليلة الحنة، والبيت من امبارح ما بيهدأش من دخول الستات وخروجهم، وصوان الفرح بيتنصب قدام البيت، والذبائح اتحجزت، والبلد كلها تقريبًا عارفة إن بنت وهدان داخلة بيت الهوارية. لكن أول ما دخلت أوضتها... وقفت مكاني. الدولاب مفتوح على آخره. كام شماعة فاضية بتتحرك من الهوا اللي داخل من الشباك. شنطة السفر الكبيرة بتاعتها مش موجودة. والأغرب... فستان فرحها الأبيض كان متعلق على باب الدولاب. لوحده. كأنه الحاجة الوحيدة اللي قررت لين تسيبها وراها علشان تقول لنا بمنتهى الوضوح إنها مش راجعة. أمي كانت قاعدة على الأرض قدام السرير، بتضرب على صدرها وهي بتعيط: — يا مصيبتي... يا فضيحتي! عملتيها يا بنت بطني؟! عملتيها؟! قربت منها بسرعة ونزلت على ركبتي قدامها: — اهدي يا ماما... يمكن راحت عند واحدة صاحبتها، يمكن اتخنقت، يمكن... رفعت وشها ليا وصرخت: — واخدة هدومها ودهبها وبطاقتها يا أسما! صاحبتها إيه اللي هتاخد لها شنطة هدوم؟! اتجمدت. لفيت ناحية السرير. وهناك شفت أبويا. كان واقف في نص الأوضة كأنه كبر عشرين سنة في ليلة واحدة. أبويا وهدان عمره ما كان راجل ضعيف. طول عمري شايفاه واقف مستقيم، صوته عالي وقت الحق، وضهره ما ينحنيش لحد. إنما الصبح ده... كان ماسك ورقة صغيرة، وإيده بتترعش. دخل عمي حسان بسرعة وهو بيقول: — في إيه؟ صوتكم جايب آخر الشارع! أبويا ما ردش. عمي خطف الورقة من إيده وفتحها. وأنا كنت عارفة خط لين من أول ما شفته. قرأ بصوت مخنوق: — "سامحوني... مقدرش أتجوز واحد عمري ما حبيته. متدوروش عليا... أنا عارفة إني وجعتكم، بس لو فضلت كنت هظلم نفسي وأظلمه معايا. أنا آسفة." سكت عمي. وأبويا حط إيده على صدره وقعد على طرف الكرسي. أمي صرخت: — يا نهار أسود! أما عمي فضرب كف على كف: — لا حول ولا قوة إلا بالله... اللهم أجرنا في مصيبتنا واخلف لنا خيرًا منها. وبعدين لف لأبويا: — يا فضيحتنا وسط البلد يا وهدان! بكرة الفرح! الناس كلها عارفة إن بنتك داخلة بيت الهوارية... هنعمل إيه؟! وأنا؟ كنت واقفة ساكتة. لأن الموضوع ماكانش مجرد عريس وعروسة وعروسته هربت. لو كان عريس عادي، كان ممكن أبويا يروح له ويقول له النصيب ما تمش، وكل واحد يروح لحاله. إنما دي بلاد الصعيد. ودي عائلات ليها حسابات قديمة، وكلمة الراجل فيها ساعات تبقى أغلى عنده من فلوسه وأرضه. والعريس... مش أي عريس. ناصيف الهواري. كبير عيلة الهواري رغم إن سنه ماعداش خمسة وتلاتين سنة. راجل كلمته مسموعة، والناس بتحسب له ألف حساب. بعد مرض أبوه من كام سنة، هو اللي شال حمل العيلة. بيحل خلافاتهم. بيتدخل في مشاكلهم. ومافيش قرار كبير يتاخد في بيوت الهوارية إلا لما يعرفه. حتى الرجالة الأكبر منه سنًا كانوا بيحسبوا لكلامه حساب. وأختي لين كانت مخطوباله من ست شهور. ولو إن كلمة "مخطوبة" نفسها كانت أكبر من الحقيقة. الجوازة كلها بدأت باتفاق بين العيلتين. أبو ناصيف كان صاحب معرفة قديمة بأبويا، وفي أرض ومصالح ونسب قديم بيربط العيلتين. ناصيف طلب بنت وهدان. وأبويا رشح لين لأنها الكبيرة. ناصيف وافق. وخلاص. لا قعدات حب. ولا خروج. ولا مكالمات بالساعات. حتى الرؤية الشرعية اللي كان المفروض تحصل اتأجلت أكتر من مرة بسبب سفر ناصيف وشغله ومشاكل العيلة، ولين نفسها كانت كل مرة تتحجج. لحد ما الموضوع اتحول عند الكل إلى: ناصيف هيتجوز لين بنت وهدان. اسم في مقابل اسم. عيلة قدام عيلة. واتفاق رجالة. وأنا أصلًا عمري ما شفته. كنت أسمع عنه بس. لين كانت بتكرهه قبل حتى ما تتعامل معاه. والسبب الحقيقي ماكانش الجوازة بس. كان فيه حكاية قديمة بينها وبين أخته مهيرة. الاتنين كانوا زمايل في المدرسة الثانوية. وفي يوم حصلت بينهم خناقة كبيرة. أنا وقتها كنت أصغر منهم، وماعرفتش تفاصيلها كاملة. كل اللي عرفته إن لين رجعت البيت يومها مولعة. وقالت كلام صعب جدًا عن مهيرة وعن أخوها. وأهل العيلتين تدخلوا قبل ما الموضوع يكبر. مرت السنين... ودارت الأيام بطريقة غريبة. والراجل اللي لين شتمته من غير حتى ما تشوفه بقى عريسها. من يوم الخطوبة وهي تقول لي: — أنا مش هقدر أعيش في بيت الهوارية يا أسما. وأنا كنت أرد: — إنتِ أصلًا ما تعرفيش الراجل. فتقول بعناد: — مش لازم أعرفه. كفاية أعرف أخته. وأضحك وأقول: — هتتجوزي أخته يعني؟ فتبصلي بغيظ: — إنتِ دايمًا بتاخدي كل حاجة ببساطة. يمكن فعلًا كنت باخدها ببساطة. أو يمكن... ماكنتش متخيلة إن لين ممكن تعملها فعلًا. تهرب. وتسيبنا كلنا في وش المدفع. أمي كانت بتبكي: — هنعمل إيه لما الهوارية يعرفوا؟ أبوكي مش هيقدر يرفع راسه تاني! قربت منها ومسحت دموعها: — يمكن لين ترجع يا ماما... ادعي إنتِ بس. عمي بصلي بعصبية: — ترجع؟! دي لو ناوية ترجع ما كانتش سابت الورقة دي! أختك الله يسامحها فضحتنا يا أسما يا بنتي. وسكت ثانية، قبل ما يضيف بصوت أخفض: — ولو كبار عيلتنا عرفوا اللي عملته من غير ما نتصرف بحكمة، الموضوع ممكن يكبر بطريقة محدش يقدر يلمها. بصيت له بخوف. — يعني إيه؟ أبويا رفع عينه له فجأة: — محدش يقرب من بنتي. كانت أول جملة يقولها من ساعة ما دخلت. صوته كان ضعيف... لكن حاسم. — مهما عملت لين، محدش له عندها حاجة غيري. سامعين؟ عمي تنهد: — وأنا قلت مين يقرب لها؟ أنا بقول لازم نلحق المصيبة قبل ما تبقى مصيبتين. وفجأة... صوت عربيات جه من بره. مش عربية واحدة. أكتر من عربية. وبعدها سمعنا أصوات رجالة عند الباب. البيت كله سكت. حتى أمي بطلت عياط للحظة. عمي قرب من الشباك، رفع طرف الستارة وبص. ثانيتين... ورجع لنا ووشه متغير. — الهوارية. أمي شهقت: — عرفوا؟! — لأ... جم لعوايد ليلة الحنة. بص لأبويا. — هنتصرف إزاي يا وهدان؟ حسيت قلبي وقع في رجلي. مش خوفًا من شخص بعينه قد ما هو خوف من اللحظة نفسها. الحقيقة فوق في الأوضة. والعريس تحت. وعروسته... الله أعلم فين. أمي قامت بسرعة وهي بتقول: — أسما ادخلي أوضتك. لفيت ناحية الباب. وقبل ما أتحرك، سمعت خبطتين تقال على باب البيت. وبعدين صوت فتح الباب. صوت سلامات رجالة. وصوت عمي التاني بيرحب: — يا مرحب بالهوارية... البيت نور. وقفت مكاني ثانية. ماعرفش ليه فضولي غلبني. أنا عمري ما شفت ناصيف الهواري. الراجل اللي أختي هربت علشان ما تتجوزوش. الراجل اللي نص البلد بتحكي عن شدته. اتحركت ناحية طرقة جانبية بتطل على الصالة من بعيد. ووقفت في مكان محدش يقدر يشوفني منه بسهولة. أول واحد دخل كان راجل كبير في السن. عرفت بعدين إنه والده. وراه اتنين من أعمامه. وبعدين... دخل هو. ولأول مرة عيني وقعت على ناصيف الهواري. كنت متوقعة أشوف راجل مخيف. ملامحه قاسية. يمكن أكبر من سنه. يمكن مجرد نظرة منه تخلي الواحد يرجع خطوتين. لكن اللي شفته لخبط الصورة اللي كنت عاملاها في دماغي. كان طويل بشكل واضح. عريض الكتفين. لابس جلابية صعيدي غامقة، بسيطة جدًا، لكن وقفته خلتها أهيب من أغلى بدلة. بشرته قمحية. شعره أسود قصير. ولحيته مهذبة. ملامحه حادة... لكنها وسيمة بصورة مستفزة. النوع اللي أول ما يدخل مكان، عينيك تروح له حتى لو مش عايزة. بس أكتر حاجة شدتني ماكانتش وسامته. كانت عينيه. هادية. ثابتة. بتلف على الموجودين كأنه بيلتقط كل تفصيلة من غير ما يتكلم. وفجأة... لف ناحية المكان اللي أنا واقفة فيه. رجعت لورا بسرعة. قلبي خبط بعنف. استغفرت ربنا تحت نفسي. — أستغفر الله العظيم... وأنا مالي أصلًا؟ رجعت ناحية أمي. لكن قبل ما أوصل، سمعت صوته لأول مرة. صوت رجولي هادي، لا عالي ولا عصبي: — مالكم؟ سكت الرجالة. كرر: — البيت فيه حاجة؟ أبويا رد بسرعة: — خير يا ولدي... خير إن شاء الله. — وشك ما يقولش خير يا عم وهدان. الصمت اللي جه بعدها كان مرعب. عمي حسان تدخل: — تعب بسيط بس. ضغطه علي الصبح. ناصيف قال: — سلامتك يا عم وهدان. — الله يسلمك يا ولدي. — نجيب حكيم؟ — لا يا ابني، الحمد لله. بقيت زين. الغريب إنه ما سألش عن لين. ولا طلب يشوفها. ولا حتى بان عليه شوق عريس داخل على فرحه بكرة. وبعد شوية سمعت أبوه بيضحك: — بكرة يا ناصيف نقول لك يا عريس بقى. رد ناصيف بمنتهى البرود: — قولوا اللي يعجبكم. ضحك الرجالة. واحد من أعمامه قال: — دا لو داخل صفقة أرض كان فرح أكتر من كده. ناصيف رد: — الجواز مش محتاج دوشة يا عمي. — أمال محتاج إيه؟ — اتفاق وراحة بال. ماعرفش ليه الجملة وقفتني. اتفاق وراحة بال. بس؟ دي نظرته للجواز؟ يمكن علشان كده لين هربت. بعد حوالي نص ساعة، الهوارية مشيوا. وأول ما صوت العربيات اختفى، البيت انفجر. أمي بدأت تعيط من جديد. عمي قفل الباب وقال: — عدينا دي... بكرة هنعمل إيه؟ أبويا كان قاعد ساكت. أنا قلت: — لازم نقول لهم. التلاتة بصوا لي. كملت: — مهما كانت النتيجة، لازم ناصيف يعرف إن لين هربت. أمي صرخت: — ونقول له قبل الفرح بساعات؟! — أحسن ما يعرف من الناس. عمي حسان هز راسه: — الموضوع مش بالسهولة دي. قلت: — طب إيه الحل؟ ماحدش رد. دخلت أوضتي. كنت محتاجة أغير هدومي وألحق محاضراتي. أيوه... وسط المصيبة دي كلها، أول حاجة جات في بالي كانت الكلية. أنا أسما وهدان. عندي واحد وعشرين سنة. في تالتة طب. ودرست طول عمري في التعليم الأزهري قبل الجامعة. لو فيه حاجة واحدة أبويا عمره ما ناقشني فيها، فهي تعليمي. من وأنا صغيرة وأنا عايزة أبقى دكتورة. مش علشان اللقب. لكن علشان فكرة إن ربنا يجعل في إيد الإنسان سببًا لتخفيف ألم حد كانت بتسحرني. لبست هدومي، وثبت نقابي، ولميت كتبي. وأنا خارجة، لقيت أمي واقفة قدامي. بصت للكتب: — رايحة فين؟ — الكلية. بصتلي كأني اتجننت. — كلية إيه يا أسما؟ أختك هربانة وإحنا مش عارفين بكرة هيحصل إيه! — وعشان لين هربت أعمل إيه أنا؟ المحاضرة مش هتستنانا. — مش هتخرجي. — ماما... — قلت مش هتخرجي! جاء صوت أبويا من وراها: — سيبيها تروح. أمي لفت له: — يا وهدان! — البت مالهاش ذنب. بص لي. — روحي يا بنتي... وارجعي بدري. قربت منه وبوست راسه. — حاضر يا بابا. خرجت. وكنت فاكرة إني هروح الكلية وأرجع ألاقيهم وصلوا لحل. لكن وأنا في الطريق، موبايلي رن. أمي. رديت بسرعة: — أيوه يا ماما؟ صوتها كان متوتر: — ارجعي. — حصل إيه؟ — أبوكي عايزك. — طب أنا لسه... صرخت: — ارجعي يا أسما! المكالمة اتقفلت. رجعت. ومن أول ما دخلت البيت، حسيت إن فيه حاجة اتغيرت. عمي حسان موجود. مرات عمي موجودة. وأمي عينيها وارمة من العياط. وأبويا قاعد في صدر الصالة. حطيت الكتب على الترابيزة. — خير؟ أبويا رفع عينه ليا. وسكت. قربت منه: — بابا؟ قال: — اقعدي يا أسما. جلست. بص لأمي. أمي نزلت عينيها. وبعدين بص لي تاني. — إنتِ عارفة إحنا في إيه. — عارفة. — وعارفة إن أختك غلطت غلطة كبيرة. — عارفة. — وعارفة إن بكرة كتب الكتاب والفرح. قلبي بدأ يدق بطريقة غريبة. ماعرفش ليه. لكن فجأة حسيت إني مش عايزة أسمع الجملة اللي بعدها. قلت بحذر: — عايز تقول إيه يا بابا؟ فتح بقه... وقفله. عمي حسان هو اللي قالها. — إنتِ اللي هتتجوزي ناصيف. ضحكت. آه والله ضحكت. مش علشان الموقف يضحك. لكن من شدة الصدمة. بصيت لهم واحد واحد. — إيه؟ أمي قربت: — اسمعينا بس يا بنتي. قمت من مكاني. — أسمع إيه؟! بصيت لأبويا. — هو عمي بيقول إيه؟ أبويا قال بصوت مبحوح: — بيقول اللي أنا عاجز أقوله. رجعت خطوة. — لأ. طلعت مني تلقائي. — لأ يا بابا. أمي مسكت إيدي: — أسما... سحبت إيدي منها. — إنتوا بتتكلموا بجد؟! يعني لين تهرب وأنا أدخل مكانها؟! عمي قال: — مش بالطريقة دي. لفيت له: — أمال بأي طريقة يا عمي؟! — دي جوازة عيلة. — وأنا مالي؟! — ناصيف راجل يتمناه ألف بيت. — يتمنوه هما! الصالة سكتت. أنا أصلًا مش من طبعي أرفع صوتي. لكن اللي بيتقال أكبر من احتمالي. بصيت لأبويا: — أنا عندي كلية. عندي حياة. وبعدين هو أصلًا عريس أختي! قال عمي: — ما حصلش بينهم عقد. — بس الناس كلها عارفة إنه عريسها! أمي بدأت تعيط: — يعني نعمل إيه؟ نروح نقول لهم بنتنا هربت؟! قلت: — آه. شهقت. — آه؟! — آه يا ماما! دي الحقيقة. عمي ضرب بإيده على مسند الكرسي: — وإنتِ فاكرة الحكاية لعبة؟ سمعة أبوكي وبيته وأختك والعيلتين كلهم متعلقين بالموضوع. — وسمعتي أنا؟ سكت. قلت وأنا حاسة دموعي بدأت تتجمع: — أنا مش بني آدمة؟ مش من حقي حد يسألني أنا عايزة أتجوز مين؟ أبويا فجأة قال: — من حقك. سكتنا كلنا. رفع عينه ليا. ولأول مرة شفت دموع في عين أبويا. — ومن حقك تقولي لأ. أمي قالت: — وهدان! رفع إيده لها. — محدش يجبر بنتي. بص لي. — لو قلتي لأ، والله ما حد يجبرك. ارتحت للحظة. لكن الجملة اللي بعدها كسرت الراحة. — بس أنا مش هخبي عليكِ يا بنتي... رفضك هيخليني أروح بكرة للهوارية وأقول لهم الحقيقة كاملة. وهتحصل فضيحة، ويمكن مشاكل بين العيلتين. وأنا أتحملها... دي غلطة بنتي وأنا أبوها. دموعي نزلت. مش لأنه ضغط عليا. العكس. لأنه ما ضغطش. ولو كان أمرني، يمكن كنت هعرف أكرهه في اللحظة دي وأرفض. لكن لما حط الاختيار في إيدي... بقى أصعب. قلت: — وناصيف؟ عمي رد: — ماله؟ — يعرف؟ الصمت جاوبني. بصيت لأبويا: — هو يعرف إن لين هربت وإنكم بتفكروا تجوزوني مكانها؟ — لأ. شهقت: — يعني عايزين تعملوا إيه؟! قال عمي: — كتب الكتاب بكرة. — وعند كتب الكتاب هيقولوا اسمي! — ساعتها يعرف. بصيت لهم بعدم تصديق. — إنتوا اتجننتوا. أمي قالت بسرعة: — أبوكي هيكلمه قبل العقد لو لزم الأمر. لكن أبويا ما أكدش كلامها. هنا فهمت. الخطة إن كل شيء يفضل ماشي... لحد آخر لحظة. قلت: — ولو رفض؟ عمي قال: — يبقى رفض. — ولو اعتبرها إهانة؟ — نتحمل. هززت راسي: — وأنا اللي هدفع تمن كل ده. قمت. لكن أبويا ناداني: — أسما. وقفت. قال: — أنا مش طالب ردك دلوقتي. نظرت له. — فكري. صلي استخارة. ولو قولتي لأ... الموضوع انتهى. دخلت أوضتي وقفلت الباب. وأول ما بقيت لوحدي... وقعت على طرف السرير. بصيت لإيدي. أنا؟ أتجوز ناصيف الهواري؟ الراجل اللي شفته من ساعات لأول مرة؟ العريس اللي كان المفروض يتجوز أختي؟ حتى ملامحه كانت لسه واضحة في دماغي. وقفته. صوته. وجملته: "الجواز محتاج اتفاق وراحة بال." ضحكت بمرارة. راحة بال؟ لو عرف اللي بيحصل دلوقتي، غالبًا الراحة دي هتتبخر للأبد. عدت ساعات وأنا بين صلاة ودعاء وتفكير. كل شوية أقول مستحيل. وبعدين أشوف أبويا قدامي. أفتكر وشه وهو ماسك ورقة لين. أفتكر كلامه: "لو قلتي لأ، محدش يجبرك." قرب المغرب، خبطت أمي. ما رديتش. دخلت. كانت شايلة صينية أكل. حطتها وسكتت. وبعدين قالت: — أنا مش جاية أضغط عليكِ. ما بصتلهاش. قعدت جنبي. — أنا أمك قبل ما أكون أم لين. سكتت. — ولو الجوازة دي هتضيعك، أنا أول واحدة أقول لأبوكي يرفض. بصيت لها. — طب إنتِ عايزاني أوافق ليه؟ دموعها لمعت. — خايفة. — من الناس؟ — من اللي ممكن يحصل. مسكت إيدي. — بس مش عايزة أنقذ بنت وأضيع التانية. لأول مرة من الصبح حسيت غضبي منها بيهدأ. سألت: — هو وحش؟ — مين؟ — ناصيف. فكرت. — ما سمعتش عنه حاجة في عرضه ولا دينه. شديد آه. صعب آه. بس راجل مسؤول. — ده مش جواب. — ماعرفوش كزوج يا بنتي. سكتنا. وبعدين سألتها: — لين كانت خايفة منه ليه؟ تنهدت. — مهيرة. — بس؟ — وكلام ناس. — يعني عمره ما أذاها؟ — على حد علمي... عمره أصلًا ما قعد معاها قعدة كاملة. اتأكد إحساسي. دي فعلًا كانت جوازة أسماء. ناصر الهواري يتجوز لين وهدان. وخلاص. قلت: — سيبيني لوحدي. قامت. وعند الباب وقفت. — مهما قررتي... إنتِ بنتي. خرجت. في نفس الوقت تقريبًا... وعلى بعد بيوت قليلة، كان ناصيف الهواري قاعد وسط رجالة عيلته. قدامه دفتر حسابات وأوراق أرض. عمه ضحك وقال: — يا ابني بكرة فرحك وإنت قاعد تحسب محصول القصب؟ ناصيف ما رفعش عينه. — المحصول مش هيحسب نفسه. أبوه قال: — سيبه. من يومه كده. عمه التاني سأله: — طب حتى شوفت عروستك زين؟ ناصيف رفع عينه ببرود. — هاشوفها في بيتي. ضحك عمه: — يا بارد! دي الناس بتقعد شهور تتعرف. رد ناصيف: — وأنا ما عنديش وقت أقعد شهور أعرف حد. أبوه قال: — بنت وهدان متربية، وأصلها معروف. هز ناصيف راسه. — وده اللي يهمني. — يعني شكلها مش فارق معاك؟ بص ناصيف لعمه. — هتفرق بإيه؟ — يا ولدي دي مراتك! ابتسم ناصيف ابتسامة صغيرة جدًا. — وأنا داخل أتجوز، مش داخل مسابقة جمال. ضحكوا. وماكانش يعرف... إن في اللحظة نفسها، في البيت التاني، بنت غير اللي يعرف اسمها قاعدة تقرر إذا كانت هتبقى مراته بكرة ولا لأ. بعد العشاء خرجت من أوضتي. أبويا كان لوحده. قعدت قدامه. رفع عينه. — استخرتي؟ هزيت راسي. — آه. سكت ينتظر. قلبي كان بيضرب بعنف. قلت: — عندي شروط. عينيه اتسعت قليلًا. — يعني...؟ — ما قلتش موافقة لسه. — قولي شروطك. — دراستي ما تتوقفش. — حاضر. — كلية الطب خط أحمر. مهما حصل. — حاضر. — محدش يجبرني أسيب نقابي. — حاضر. سكت لحظة. وبعدين قلت: — ولو ناصيف لما يعرف الحقيقة رفض... محدش يلومني. أبويا نزل عينه. — محدش يلومك. — ولو وافق... بلعت ريقي. — يبقى لازم يعرف إني مش لين. رفع عينه ليا. — هيعرف. — إمتى؟ هنا سكت. فهمت الإجابة. قلت: — عند كتب الكتاب؟ — يا بنتي... — عند كتب الكتاب يا بابا؟ تنهد. — أيوه. قمت من مكاني. — ده غلط. — عارف. — وممكن يهيننا كلنا. — عارف. — وممكن يقوم ويمشي. — عارف. — وبرضه هتعمل كده؟ رفع عينه. وقال جملة ما نسيتهاش: — ساعات يا بنتي، الإنسان بيبقى قدامه طريقين... الاتنين غلط. فيختار الطريق اللي ضرره أقل. سكت. وبعدين سأل: — قرارك إيه؟ غمضت عيني. دعيت ربنا في سري. وبعدين قلت: — موافقة. أبويا ما فرحش. وده وجعني أكتر. بس قام... وقرب مني... وحط إيده فوق راسي. — ربنا ما يكتب لك إلا الخير يا بنتي. دخلت أمي لما سمعت. وأول ما عرفت، حضنتني وعيطت. وأنا واقفة بين إيديها... ما عيطتش. الغريب إني كنت هادية جدًا. يمكن لأن عقلي لسه ما استوعبش. بكرة... هصحى مش علشان أحضر فرح أختي. هصحى علشان أبقى أنا العروسة. الصبح جه أسرع مما كنت أتمنى. من بدري، البيت اتقلب. لكن المرة دي كل حاجة كانت بتحصل في السر. الستات القريبين جدًا مننا بس عرفوا. فستان لين ما نفعنيش تمامًا. كانت أقصر مني شوية، وجسمنا مختلف. جابوا خياطة قبل الفجر تقريبًا وعدلت اللي تقدر عليه. رفضت حاجات كتير من تجهيزات العروسة. قلت لأمي: — مش عايزة زفة كبيرة. — الناس هتستغرب. — يقولوا اللي يقولوه. — والنقاب؟ بصيت لها. — هفضل زي ما أنا. هزت راسها. وقبل المغرب بساعات... قعدت قدام المراية. كنت لابسة فستان أبيض بسيط، واسع، بأكمام طويلة. طرحة طويلة نازلة على كتفي. ونقابي الأبيض مغطّي وشي، ماعدا عيني. عيني اللي كانت أمي دايمًا تقول إن لونها مش أخضر ولا عسلي. زيتوني. لين كانت جميلة. وكل الناس كانت تقول كده. لكن الغريب إن المقارنة بينا كانت دايمًا تضايقها. من وإحنا صغيرين، أي حد يشوفني يقول لأمي: "دي الصغيرة؟ سبحان الله... ملامحها مختلفة." كنت أكره الجملة. لأن بعدها لين تسكت بالساعات. علشان كده عمري ما اهتميت بكلام الناس عن شكلي. ومع النقاب، الموضوع بقى أريح لي. محدش له عندي غير اللي أسمح له يشوفه. دخلت أمي. وقفت ورايا. وبصت لي في المراية. وبدأت تعيط. قلت: — بالله عليكِ يا ماما مش النهارده. — غصب عني. مسحت دموعها. — كان نفسي يومك يبقى غير كده. رديت بهدوء: — يمكن ربنا كاتب يومي كده. سمعنا أصوات عربيات. وقلبي توقف للحظة. أمي همست: — جم. ما سألتش مين. عارفة. الهوارية. وفي الناحية التانية من البيت... كان ناصيف نازل من عربيته. لابس جلابية بيضا فوقها عباءة سوداء خفيفة. والرجالة حواليه بتهنيه. واحد صاحبه قرب منه وضربه على كتفه: — مبروك يا كبير. ناصيف رد بابتسامة خفيفة: — الله يبارك فيك. دخل البيت. سلّم على أبويا. ولاحظ فورًا توتره. قال: — مالك يا عم وهدان؟ — مفيش يا ابني. ناصيف ثبت عينه عليه ثانيتين. لكنه ما سألش أكتر. المأذون وصل. الرجالة قعدت. الأوراق اتحطت. بطاقتي كانت مع أبويا. وقبل ما المأذون يبدأ الإجراءات، ناصيف كان بيتكلم مع عمه في حاجة جانبية. المأذون راجع البيانات. وبعدين رفع صوته: — العريس الأستاذ ناصيف الهواري؟ — أيوه. — والعروسة الآنسة... سكت وهو بيقرأ البطاقة. أبويا وشه اتغير. عمي حسان بص في الأرض. والمأذون كمل: — أسما وهدان... الصمت نزل على المكان مرة واحدة. ناصيف ما اتحركش. ثانية. اتنين. تلاتة. وبعدين لف راسه ببطء ناحية أبويا. نظرة واحدة منه خلت عمي حسان يقوم من مكانه. قال ناصيف بهدوء غريب: — اسم مين؟ المأذون افتكر إنه ما سمعش. — العروسة يا حاج... الآنسة أسما وهدان. ناصيف ما بصش له. فضل باصص لأبويا. وبعدين قال: — عم وهدان. أبويا قام. ناصيف أشار ناحية باب جانبي. — عايزك كلمتين. خرجوا. وأنا كنت في الأوضة اللي جنب الصالة. سامعة. مش كل الكلام... لكن سامعة الأصوات. وقف ناصيف قدام أبويا. وسأله من غير لف ولا دوران: — فين لين؟ أبويا سكت. — سألتك فين بنتك؟ — هربت. لأول مرة، ملامح ناصيف اتحركت فعلًا. — إيه؟ أبويا رفع عينه له: — لين هربت امبارح الصبح. سكت ناصيف. صمت طويل. مخيف. وبعدين سأل: — وأسما؟ — أختها. — عارف إنها أختها. إيه اللي جاب اسمها في عقد جوازي؟ أبويا قال: — وافقت تتجوزك. ضحك ناصيف ضحكة قصيرة خالية من المرح. — وأنا آخر واحد يعرف؟ أبويا ما دافعش عن نفسه. — غلطت. — دي مش غلطة. — عارف. — كان ممكن تيجي لي من امبارح. — كان ممكن. — وما جيتش. — خفت الموضوع يكبر بين العيلتين قبل ما أعرف قرار أسما. ناصيف قرب خطوة. — والبنت موافقة؟ — أيوه. — محدش أجبرها؟ — أقسم بالله ما أجبرتها. سكت ناصيف. وبعدين سأل سؤالًا خلاني أرفع راسي من ورا الباب: — بتدرس؟ أبويا استغرب. — إيه؟ — أسما. بتعمل إيه؟ — في تالتة طب. — الأزهر؟ — تعليمها قبل الجامعة كان أزهري، ودلوقتي في كلية الطب. هز ناصيف راسه ببطء. وبعدين قال: — وهي عارفة إني ماكنتش طالبها هي؟ قلبي انقبض. أبويا قال: — عارفة. — وعارفة إني وافقت على الجوازة دي علشان النسب بين البيتين؟ — عارفة. صمت. ثم قال ناصيف ببرود: — خلاص. أبويا رمش. — خلاص إيه؟ — نكمل. حتى أنا اتصدمت. أبويا قال: — ناصيف... قاطعه: — أنا لما وافقت أتجوز لين، ما وافقتش علشان بيني وبينها حب. ولا علشان أعرفها. أنا وافقت على بنت من بيت وهدان. سكت ثانية. وبعدين قال الجملة اللي دخلت قلبي زي السكينة: — لين ولا أسما... بالنسبة لي الاتنين كانوا اسم في ورقة. حسيت إيدي بردت. وكمل: — ما دامت أسما موافقة بإرادتها، والنسب هو النسب... نكمل الليلة. أبويا سأله: — مش عايز تشوفها؟ رد بمنتهى الهدوء: — بعد العقد. ورجع ناحية المجلس. وأنا فضلت واقفة مكاني. مش عارفة ليه كلامه وجعني. هو ما غلطش. أنا فعلًا بالنسبة له ولا حاجة. وهو بالنسبة لي تقريبًا غريب. لكن يمكن... جوا كل بنت، حتى لو دخلت جوازة بالعقل، جزء صغير بيتمنى ما يكونش مجرد اسم في ورقة. مسحت دمعة نزلت غصب عني. سمعت صوت المأذون من الخارج. وصوت ناصيف واضح: — اتفضل يا مولانا. وبعد دقائق... بدأت الكلمات اللي هتغير حياتي. وأنا قاعدة في الأوضة، أصابعي بتترعش فوق بعضها. لحد ما دخل أبويا. قرب مني. وقال: — ناصيف عرف. رفعت عيني له. — وعمل إيه؟ — وافق يكمل. سألته رغم إني عارفة الإجابة: — ليه؟ أبويا سكت. قلت: — سمعت. نزل عينه. ابتسمت بمرارة: — اسم في ورقة... صح؟ — يا بنتي، هو ما يقصدش يهينك. — عارفة. وأنا فعلًا كنت عارفة. لكن المعرفة ما منعتش الوجع. مد أبويا إيده ليا. — المأذون مستني موافقتك. بصيت لإيده. ثم رفعت عيني ناحية الباب. الراجل الموجود خلفه بعد دقائق هيبقى زوجي. راجل ما يعرفش شكلي. ما يعرفش صوتي تقريبًا. ما يعرفش عني غير اسمي... وإني في تالتة طب. وأنا ما أعرفش عنه غير كلام الناس. ومع ذلك... مددت إيدي لأبويا. وقمت. قلت بصوت ثابت: — موافقة. وبعد دقائق... وصلني صوت المأذون: — بارك الله لكما وبارك عليكما وجمع بينكما في خير. ارتفعت أصوات المباركات. وأنا أغمضت عيني. بقيت زوجة ناصيف الهواري. الرجل اللي كان المفروض يتجوز أختي. وفي الخارج... كان ناصيف بيسلم على الرجالة بمنتهى الهدوء، كأن اللي حصل مجرد تغيير صغير في اتفاق قديم. لكنه ماكانش يعرف إن اللي اتغير النهارده... ماكانش اسم العروسة وبس. لأن بعد أقل من ساعة... لما يدخل عليا لأول مرة بصفته جوزي، ويطلب مني أشيل النقاب علشان يشوف وش مراته... ناصيف الهواري هيكتشف إن أول حاجة ما كانتش في حساباته في الجوازة دي... كانت أنا. يتبع — الفصل الثاني: أول مرة يشوف وش مراته بقلم الكاتبة أسما السيد — حصري

مقالات ذات صلة

ماجد المصري يكشف لأول مرة تفاصيل مـ،ـر.ضه

حـ,,ـكم من يصلي جالسا

أمريكا

حالة الطـ,ـقس

حكم لقاء الاز.واج بعد كتب الكتاب وقبل الز.فاف

امه و اخته

اترك تعليقاً إلغاء الرد