لما دخلت
. اتكلمت معاه واتعرفنا ولقيت نفسي بدون خجل ومرة واحدة بطلب منه ٢٠ جنيه، قولتله إني محتاجاها عشان أرجع البيت، والغريب إنه أدهاني بشرط إننا نقضي اليوم مع بعض، وفعلًا قعدنا وكلنا وشربنا قهوة وركبني كمان من برة الكلية.. وده كان اليوم الوحيد اللي كنت مبسوطة فيه أوي، وحاسة إني عملت كل حاجة كنت بتمناها، وتاني يوم اتقابلنا، وبدأ يحكيلي عن حاجات كتير خاصة في حياته، وإنه بقا بيستخدم الأسلوب ده وبيعمل فلوس كتير أوي يوميًا، في الشارع والمواصلات والكلية وكل حتة تقريبًا.
. وقلي إنه بيتفنن في موضوع التسول ده، لدرجة إنه حكالي مواقف عجيبة كانت بتمـ,ـوتني من الضحك، وبقيت بقضي معاه نص اليوم، يتسول ونقسم الفلوس سوا، لحد ما اتعلمت منه وقالي إننا هنعمل شغل محترم مع بعض.. نزلنا اشترينا طقم شيك أوي وبقيت بمشي في الكلية اصطاد الشباب اللي واضح عليه إنه محترم ومهذب وأطلب منه ١٠ جنيه لأن فلوسي وقعت، وطبعًا بنت شيك ومهذبة وبتتكلم بخجل محدش هيرفضلها طلب، وبقيت بجمع يوميًا أكتر من ١٠٠ جنيه الصبح وأنا داخلة، وطبعًا كنت بغير وقفتي في أكتر من مكان عشان محدش ياخد باله مني.
. ومع الوقت مبقتش حابة إنه يقسم معايا وبقيت بحاول أهرب منه وأسيبه، وبدأ يطاردني في كل مكان بروحه، لحد ما هددته إني هروح لعميد الكلية وإنه لازم يسبني لوحدي، أنا خلاص مش محتاجاه وبقيت بعمل أكتر من اللي بيعمله بمراحل.. وبقيت بنزل يوم مفيش فيه محاضرات وأعمل يجي ٢٠٠ جنيه وأصرف منهم طول الأسبوع مع البنات وأدلع نفسي، كنت مبسوطة أوي وطايرة من الفرحة واندمجت أكتر مع البنات، والشاب قرر يسبني خالص بعد ما فعلًا خاف أحسن أبلغ عنه وقال الطيب أحسن.
. وعدت سنتين على الموضوع ده وبقيت بصطاد الشباب اللي في سنة أولى وتحديدًا أول أسبوع كلية وبعمل مبلغ حلو، وبقيت عارفة مين هيدفع ومين لا، وبقيت بزود في طلباتي وبقدر أجمع مبالغ حلوة، لحد ما قربت أكتر من واحدة زميلتي كانت عايشة مع أمها لأن أبوها كان منفصل عن أمها، كانوا عايشين في شقة في مكان راقي، والبنت دايمًا معاها فلوس مبتخلصش..
وفي يوم قالتلي إنها هتنزل البنك تسحب مبلغ كبير لأن أمها هتشتري عربية، وطلبت مني أروح معاها وبالمرة نقضي اليوم في شقتهم لحد ما أمها ترجع، معرفش ليه سرحت، سرحت في قيمة المبلغ اللي كان كبير أوي، مبلغ كفيل يخليني أتحرر تمامًا من سُلطة أبويا، وفضلت سرحانة وعمالة أتخيل لو المبلغ ده معايا لحد ما كلمتني وقالتلي هنأجل المشوار تلت أيام لأن المعرض اتأخر في تجهيز العربية وأمها مش هتسحب اليومين دول.
